"ओळखलत का सर मला" -- पावसात आला कोणी
कपडे होते कर्दमलेले, केसांवरती पाणी.
क्षणभर बसला नंतर हसला बोलला वरती पाहून:
"गंगामाई पाहुणी आली, गेली घरट्यात राहून
माहेरवाशीण पोरीसारखी चार भिंतीत नाचली
मोकळ्या हाती जाईल कशी - बायको मात्र वाचली --
भिंत खचली चूल विजली होते नव्हते नेले
प्रसाद म्हणून पापण्यांमध्ये पाणी थोडे ठेवले --
कारभारणीला घेऊन संगे सर, आता लढतो आहे
पडकी भिंत बांधतो आहे. चीक्खल गाळ काढतो आहे" --
खिश्या कडे हात जाताच हसत हसत उठला
"पैसा नको सर, जरा एकटेपणा वाटला --
मोडून पडला संसार तरी मोडला नाही कणा
पाठी वरती हात ठेऊन नुसते लढ म्हणा."
